Եվրասիա համագործակցություն հիմնադրամը (ԵՀՀ) և Մեդիա նախաձեռնությունների կենտրոնը (ՄՆԿ) «Մեդիան քաղաքացիների տեղեկացված մասնակցության համար» ծրագրի շրջանակում հայտարարում են «Այլընտրանք» մեդիա բովանդակության արտադրության դրամաշնորհային մրցույթ:

Ծրագրի նպատակն է՝ նպաստել Հայաստանում մարդու իրավունքների ու հիմնարար ազատությունների շուրջ ստեղծագործ և նորարարական հեղինակային մեդիա բովանդակության ստեղծմանը և տարածմանը։   

Ակնկալվում է, որ թեմաները, վերջնական արտադրանքը և ընտրված ձևաչափերը կհասցեագրվեն ստորև ներկայացված ուղղությունների համատեքստում․

• Հայաստանում տեղի ունեցող, հանրության ուշադրության կենտրոնում գտնվող և ակտիվորեն քննարկվող խնդիրների և իրադարձությունների քննադատական ուսումնասիրություն,
• Երկրի և հասարակության համար կարևոր նշանակություն ունեցող, բայց հանրային ուշադրությունից դուրս մնացած թեմաների վերհանում և քննարկում,
• Հասարակության համար քննարկման և քննադատության տեսանկյունից տաբուավորված կամ կարծրատիպային ընկալումներ ձևավորած թեմաների վերհանում և վերլուծություն։

Ընտրված թեմաները կարող են ներկայացնել, օրինակ,  մարդու ճակատագիր, չբացահայտված դեպք, երկրի, հասարակության, խոցելի խմբերի, անձի ներկայի և անցյալի հետ կապված պատմություն/ներ, (հակա)քարոզչության և թիրախավորված մեդիա մանիպուլյացիաների բացահայտում, պատմական դեպքերի և հասարակությունում քննարկված թեմաների այլընտրանքային մեկնաբանություն, Հայաստանում ժողովրդավարական արժեքների ընկալումը՝ աշխարհում տեղի ունեցող հասարակական զարգացումների համատեքստում և այլն։

Ծրագիրը կարող է առաջարկվել ցանկացած մեդիա հարթակում, այդ թվում միաժամանակ տարբեր հարթակներում (crossmedia/transmedia) աշխատելու համար՝ հեռուստատեսություն, տպագիր, ռադիո, մոբայլ և այլն։

Կազմակերպիչներն ակնկալում են տարբեր ժանրերի և ձևաչափերի արտադրանք, մասնավորապես՝ վավերագրական ֆիլմեր, թոք-շոուներ, բանավեճեր, փոքր սերիալներ, նոր մուլտիմեդիա ձևաչափեր, տեքստային նոր մոտեցումներ և այլն։ Խրախուսվում է  ժամանակակից մեդիա գործիքների օգտագործումը, հեղինակային, յուրահատուկ մոտեցումը թեմային։ Առաջարկը չպիտի կրկնի արդեն եղած ձևաչափը և պիտի տարբերվի լրատվամիջոցների առօրյա արտադրանքից։ Հատուկ ուշադրություն կդարձվի լսարանների թիրախավորմանը և ընդգրկմանը, ինչպես նաև լսարանների հետ հետադարձ կապի ապահովմանը՝ նյութերի ազդեցիկությունը գնահատելու նպատակով:

Մրցույթին կարող են դիմել

• Մեդիան քաղաքացիների տեղեկացված մասնակցության համար (ՄՔՏՄ) ծրագրի թիրախային լրատվամիջոցները[1],
• Անհատ լրագրողները, ռեժիսորները կամ ստեղծագործական խմբերը և ստուդիաները, որոնք կստեղծեն և կտարածեն իրենց հեղինակային արտադրանքը՝ համագործակցելով ՄՔՏՄ ծրագրի թիրախային լրատվամիջոցների հետ։

Դրամաշնորհի տևողությունը և բյուջեն 

Յուրաքանչյուր ծրագրի տևողությունը կարող է լինել մինչև 12 ամիս:

Մեկ դրամաշնորհի սահմաններում կտրամադրվի 2.500.000-ից մինչև 10.000.000 ՀՀ դրամ:

Համաֆինանսավորման պահանջ 

Հայտատու կազմակերպությունից ակնկալվում է առնվազն 15% համաֆինանսավորում  ծրագրին` դրամական և/կամ ոչ դրամական միջոցներով։

ԱՄՆ կառավարությունից ստացած այլ դրամաշնորհներ կամ միջոցները չեն դիտարկվի իբրև համաֆինանսավորում:

Հայտերի գնահատման չափանիշներ  

ԵՀՀ-ին ներկայացված հայտերը նախնական գնահատում կանցնեն ծրագրային թիմի կողմից՝ մրցույթին չհամապատասխանող առաջարկները բացառելու համար։ Այնուհետև հայտերը կներկայացվեն փորձագիտական հանձնաժողովին և կգնահատվեն ըստ հետևյալ չափանիշների։

 

№	Չափանիշ	Միավոր
1	Նշված թեմաներին և ուղղություններին համապատասխանությունը	15
2	Ներկայացված ծրագրի նորարարությունը, նոր մեդիա գործիքների և մուլտիմեդիա ժանրերի կիրառումը և այլն	25
3	Գաղափարի յուրահատուկ և գրավիչ լինելը, թեմայի ակտուալությունը և կարևորությունը, յուրահատուկ հեղինակային մոտեցումները, հետաքրքիր պատմությունների և հերոսների առկայությունը, այն, թե որքան նշանակալի և կիրառելի է գաղափարը հանրային քաղաքականության և Հայաստանի զարգացման հեռանկարների տեսակետից	15
4	Արտադրանքի տարածման ռազմավարությունը, ազդեցության հավանականությունը	20
5	Ծրագրի բյուջեի ողջամտությունը և ծրագրի նպատակներին համապատասխանությունը	25

Դրամաշնորհին դիմելու կարգը 

Ծրագրին մասնակցելու համար հայտատուները պետք է լրացնեն հետևյալ փաստաթղթերը և ներկայացնեն ԵՀՀ՝ էլեկտրոնային տարբերակով։ Հայտը կարող է ներկայացնել լրատվամիջոցը՝ ընդրգկելով գործընկեր հայտատուին, կամ գործընկեր հայտատուն՝ նշելով թիրախային այն լրատվամիջոցը, որի հետ պայմանավորվածություն է ձեռք բերել։

Անհրաժեշտ փաստաթղթերի ցանկ
Թիրախային լրատվամիջոցներ	Անհատներ կամ ստեղծագործական խմբեր
Հայտադիմում՝ Հավելված 1	Հայտադիմում՝ Հավելված 2
Ծրագրային բյուջեն՝ ներկայացված ձևաչափով, և բյուջեի նկարագիրը- Հավելված 3	Ծրագրային բյուջեն՝ ներկայացված ձևաչափով, և բյուջեի նկարագիրը Հավելված 3
Տրամաբանական մոդելը՝ Հավելված 4	Տրամաբանական մոդելը՝ Հավելված 4
Գործողությունների պլան՝ Հավելված 5	Գործողությունների պլան՝ Հավելված 5
Կիսաեզրափակիչ փուլ անցած թիրախային լրատվամիջոցի համար` Դրամաշնորհների կառավարման հարցաթերթիկ (GMQ form)։ Հավելված 6։	Համագործակցության նամակ՝ համապատասխան թիրախ լրատվամիջոցի կողմից։

Հայտերը պիտի ուղարկվեն [email protected] էլ. փոստին: Ներկայացնողը էլեկտրոնային նամակի գլխագրում (subject line) պիտի  նշի “MICE_AMP_Grants_Competition”: Բոլոր անհրաժեշտ փաստաթղթերը կցվում են այս հայտարարությանը: 

Մրցույթին դիմելու վերջնաժամկետը 2018 թ-ի հունիսի 25-ն է։

Նախամրցութային սեմինար

«Այլընտրանք» մեդիա բովանդակության արտադրության դրամաշնորհային ծրագրի մրցույթի շրջանակներում կկազմակերպվի նախամրցութային սեմինարը, որը տեղի կունենա մայիսի 25-ին, ժամը 15:00-18:00, «ԻԲԻՍ Երևան Կենտրոն»-ում։ Հասցեն՝ ք․ Երևան, Հյուսիսային պող., 5/1 շենք։

Նախամրցութային սեմինարին ներկայացված պրեզենտացիան հասանելի է այստեղ:

Խնդրում ենք տեղեկացնել ձեր մասնակցության մասին գրելով կամ զանգահարելով՝ ԵՀՀ, ծրագրի ղեկավար Վարուժան Ավանեսյանին հետևյալ կոնտակտներով՝ +37410 25 15 75*222; + 37455 57 51 50;  +37495 25 15 46, էլ. փոստ [email protected]

Կամ «Մեդիան քաղաքացիների տեղեկացված մասնակցության համար» ծրագրի ղեկավար Արեն Մանուկյանին, Մեդիա նախաձեռնությունների կենտրոն, հեռ. +37410 58 36 20*112, +374 95 58 36 39; Էլ.փոստ [email protected]

Մրցույթն անցկացվում է Ամերիկայի ժողովրդի աջակցությամբ՝ ԱՄՆ Միջազգային զարգացման գործակալության միջոցով իրականացվող «Մեդիան քաղաքացիների  տեղեկացված մասնակցության համար» ծրագրի շրջանակում:

Ծրագիրը համատեղ իրականացնում են Մեդիա նախաձեռնությունների կենտրոնը, Եվրասիա համագործակցություն հիմնադրամը և Ինտերնյուսը:

[1] ՄՔՏՄ ծրագրի թիրախային լրատվամիջոցների ցանկը.

Ա1+, 168 Ժամ, ԱԼՏ ՀԸ, Անկյուն +3 ՀԸ, Առավոտ, Ասպարեզ, Սիվիլնեթ, Հետք, E-press, Կենտրոն ՀԸ, Լոռի ՀԸ, Լրագիր, Լրատվական ռադիո, ՊանԱրմենիան մեդիա գրուպ, Ռադիո Վան, Հանրային ՀԸ և ռադիո, Ցայգ ՀԸ, Երկիր Մեդիա ՀԸ