Հայտերի ընդունում: Ընդունվում են խաղաղության ծրագրի մասնակցության հայտեր
Ծրագրի նկարագիրը
Գերմանիայի Կանդիդ հիմնադրամը, Հայաստանում Եվրասիա համագործակցություն հիմնադրամը և Ադրբեջանում Մարդասիրական հետազոտության միություն ՀԿ–ն համատեղ իրականացնելու են մի նախագիծ` ուղղված Հայաստանի և Ադրբեջանի քաղաքացիական հասարակությունների մերձեցմանը։
Ծրագրի շրջանակներում երկու երկրների (ինչպես նաև Լեռնային Ղարաբաղի) երիտասարդ մասնագետները պետք է գրեն փոքր էսսե՝ ներկայացնելով իրենց գաղափարները և տեսլականը կյանքի կամ կյանքի տարբեր ոլորտների վերաբերյալ առաջիկա մի քանի տարիներին խաղաղության համաձայնագիր կնքվելու պարագայում: Այս համատեքստում հոդվածները (էսսեները) կարող են պատասխանել հետևյալ հարցերին.
- Ինչպե՞ս խաղաղության համաձայնագիրը կանդրադառնա սահմանային գյուղերի կյանքին։
- Ի՞նչ զգացողություններ կլինեն՝ առաջին անգամ հարևան երկիրը տեսնելով կամ երկու տասնամյակ հետո այնտեղ վերադառնալով:
- Ի՞նչ ազդեցություն կունենա խաղաղության համաձայնագիրը երկու երկրների զարգացման վրա։
Ծրագրի նպատակն է ստեղծել Հարավային Կովկասում համատեղ ապագայի վերաբերյալ դրական տեսլականներով մի խճանկար (պատկեր)։
Հոդվածները կտպագրվեն գրքում, ինչպես նաև կտեղադրվեն առցանց հարթակում։ Հայ և ադրբեջանցի մասնակիցները կհանդիպեն և կքննարկեն իրենց գաղափարները Վրաստանում։
Ինչ կստանան մասնակիցները
Մասնակիցները կդառնան հայկական և ադրբեջանական կողմերի մերձեցման ջանքերին ուղղված աշխատանքների մի մաս, ինչպես նաև կնպաստեն հակամարտության սրացումը մեղմացնելու գործին։ Նրանք հնարավորություն կստանան փոխանակել իրենց գաղափարները և տեսակետները Ադրբեջանի առաջադեմ երիտասարդների հետ և իրենց ստեղծագործական աշխատանքները հրապարակելու հնարավորություն կստանան։
Ծրագրի շրջանակներում մասնակիցները կստանան փոքր դրամական պարգևատրում իրենց էսսեների համար։ Կփոխհատուցվի դեպի Թբիլիսի ուղևորության բոլոր ծախսերը։
Մասնակցության պահանջները
- տարիքը՝ 23-33
- անգլերենի գերազանց իմացություն
- երկխոսության մեջ մտնելու ցանկություն
- ստեղծագործականություն, երևակայություն և գրելու տաղանդ
- գիտական, գիտահետազոտական, լրագրության, արվեստի ոլորտներում, ինչպես նաև պետական հաստատություններում աշխատելու, քաղաքական ակտիվության փորձը ցանկալի է, բայց ոչ պարտադիր
- մինչև 2015 թ. հոկտեմբերի կեսը էսսե (3-5 էջ) գրելու ցանկություն
Ընտրված մասնակիցները պետք է ներկա լինեն 2015թ. օգոստոսի 14–ին կայանալիք մեկնարկային հանդիպմանը, ինչպես նաև 2015թ. սեպտեմբերի վերջին Թբիլիսիում կայանալիք 3 օրյա աշխատանքային հանդիպմանը։
Հետաքրքված անձինք պետք է անգլերեն լեզվով ուղարկեն ինքնակենսագրական, ինչպես նաև փոքր նկարագրություն այն թեմաների վերաբերյալ, որոնց կցանկանան անդրադառնալ իրենց հոդվածներում։ Դիմումները պետք է ուղարկել Անի Թովմասյանին [email protected] էլ. հասցեով։
Դիմելու վերջանաժամկետն է 2015թ. օգոստոսի 9-ը։