Թղթի վրա եւ իրականում. Ձկան փոխարեն կարթ տվեք

14.04.2017

Արդյո՞ք Հայաստանից կվերանա ծայրահեղ աղքատությունը, եթե յուրաքանչյուր կարիքավոր ընտանիքի առձեռն գումարներ բաժանվեն։

«Երբևիցե գումար ծախսելով՝ նպաստների տեսքով մենք չենք հասնի դրան։ Միգուցե ծայրահեղ աղքատը դառնա աղքատ, բայց աղքատությունն այդպես շատ դժվար է վերացնել։ Դրա համար այլ երաշխիքներ են պետք»,- «Ա1+»-ի «Թղթի վրա եւ իրականում» հաղորդաշարի հերթական թողարկմանը  նշում է   Զբաղվածության պետական գործակալության պետի տեղակալ Արտակ Սիմոնյանը։

Ըստ նրա՝ աղքատության դեմ պայքարը կարող է արդյունավետ լինել կայուն տնտեսական աճ գրանցելով, ինչին կհետևի նոր աշխատատեղերի ստեղծումը։

«Կարևոր է նաև այդ աշխատատեղերի որակը, ինչպես նաև՝ արժանապատիվ աշխատատեղ լինելը։ Եթե մենք այս նպատակներին կարողանանք հասնել, մեծ գործ արած կլինենք: Պետությունն այսօր տալիս է ընտանեկան նպաստներ, սակայն սայլը տեղից չի շարժվում»,- ասում է պարոն Սիմոնյանը։

Աղքատ ընտանիքներին գումարներ բաժանելն իմաստ ունի, սակայն կամաց -կամաց մարդկանց գիտակցության մեջ ինչ-որ բան է փոխվում։

«Նրանք՝ հատկապես այս թեմայով աշխատող գործակալություններն եւ հաստատությունները, գալիս են այն մտքին, որ ձուկը տալու տեղը իրենց պետք է տանք կարթը և սովորեցնենք՝ ինչպես ձուկը բռնել՝ նաև ստեղծելով այն պայմանները, որ մարդիկ կարողանան այդ ձուկը բռնել»,- նկատում է ՄԱԿ-ի Զարգացման ծրագրի հայաստանյան գրասենյակի գլխավոր խորհրդական  Արտակ Մելքոնյանը։

Արտակ Սիմոնյանն էլ գտնում է՝ պետությունը պետք է ամեն ինչ անի, որ մեծանա ընտանիքներին տրամադրվող նպաստների հասցեականությունը։ Բացի այդ՝ Աշխատանքի եւ սոցիալական նախարարությունը զուգահեռ իրականացնում է այլ միջոցառումներ.   «Դրանք զբաղվածության պետական ծրագրերն են, որոնք ուղղված են մարդկանց աշխատանքով ապահովելուն, բազմաթիվ նպատակային ծրագրեր կան հաշմանդամություն ունեցող անձանց, երիտասարդների համար»։

Աղքատությունը հաղթահարելու համար պետությունն աշխատանքներ է տանում 2014 թվականին ընդունված ռազմավարությամբ, ըստ որի՝ բյուջեի գումարներն ուղղվում են հատկապես աղքատությունը հաղթահարելուն միտված ակտիվ ծրագրերին։

Մանրամասները տեսանյութում.